Kategorie: helbest

Ziryab

Istiranîya te bi teyisîna ronahîyê re

bi pêlên hêmine zeryayê re

hişkanîya siruştî li San Jose

pozên daran dilivîne

Bi dengbêjîya te re

çivîkên westyayî zerverdibin

çîwçîkên wan şêndibin

De were ji Qurtube ji dîrokê

têkeve nav dîlana kurdanî

serçopîyeke botanî bikêşe

istiraneke evîntîyê bibêje

ta barana bidûrketî

bi ser vî bajarokî de bibare

pêşanî hawîrdorê bide

çawa ba hildiperê

gavê awaza te dibîhse

Were xizmên xwe li vir

li Endelus binase

San Jose 9.10.2016

Husên Hebeş

Ziryab (789 – 857) dengbêj, mûzîkvan, helbestvan û perwedekar bû. Li gor jêderine kurdî û farisî ew li Cizîra Botan, li Kurdistanê hatîye dinê. Ziryabê behredar diçe  Îraqê, paşê bervê xwe dide Bakûra  Efrîkayê,li wir pir namîne, jîyana xwe ya hunerî, perwerdeyî û civakî li Êspanîya (Endelus), li bajarê Qurtube derbasdike. Ziryab dibe kesayetîyeke giring di çand û mûzîka endelusî de.

Advertisements

Efrîn

Dêya min

birnên te ji kwîranîyê kwîrtir in

êşên te ji pelên darên

te yî zêtwînê pirtir in

jin û keçên te tên talankirin

Efrîn

zaroyên te di van şevên xwînî de

di hemêza sermê de dixewin

memkên birçîtîyê diminjin

dinalin ji ber birînan

Efrîn

çiqas dêyên jîndar nîvmirî

ji ber azaran rojê çend caran dimirin

Efrîn

dêya min

tu yekemîn mînaya berxwedan

û evînê yî li vê dinyayê

Efrîn

mirovatî di van rojên perjengên te de

serjêkirineke daîşî ye

19.3.2018

Efrîn

Bi çekan didin pê hulmên te

li beheştê xwînê dirêjin

esmanê te yî esmanî bi qirkirina

dengê zaro û jinan reşdikin

demê pereng dikin

di vê serdemê bêbext de

Efrîn

tu Artaya Ahûrayê spente yî

bi hêza erd û esmên hatîyî parastin

Tu pîroz î çawa ba

av û ronahîyê

Tu pîroz î çawa ax

zinar û darên zêtwînê

Efrîna dê

tu pîroz î bi keç kur

jin û mêrên xwe

lê ew rêberên niha

li ser navê te hatine mêxkirin

min pir ditirsînin

Efrîn

navên rojên hefteya hevdema me

bi navên jine cangorîyên te

hatine navandin

roj artax ne yakşem û duşem in

ew Avesta Barîn

Lorîn Narîn

Nermîn Perwîn

û Kurdistan in

Her rojeke salanî ye vê cîhanê

bi navên sêsid û şêst û pênc

gundên te yî efsaneyî hatine nasîn

Efrîn

tu peristgeheke

Mîthrayî

Zerdoştî

û Lalişa Ronîdar î

Tu kilîseke cihûyî

dêreke xirsîtîyanî yî

Buhda li jordanîyê

te berxudardike

Efrîn

tu peristheha dînên vê dinê yî

tu mizgefteke kurdanî yî

dilovanîya xudê diparêzî

nimêjên musilmanan

li ser axa te ya pîroz

li bindarokên zêtwînên te rewa ne

Tu ne mizgefteke tirkanî yî

bi xwîna yonanî ermenî

kurdanî hatîyî neqişkirin

ne mizgefteke erebî yî

bi dirozên kuştina gawiran

hatîyî avakirin

ne mizgefta husêynî farsî şîî yî

gotara îmamên xwe ji Ayetulah

sîya xudê li ser erdê werdigirî

Efrîn

dîn li nav hemêza te

bi aşitî dijîn

jiberku tu Kurdistan î

Efrîn

tu yî pîrozgeha mirovatîyê

landika lehengî

û evîna vê serdemê

Bonn, Brühl 18-23.2.2018

Husên Hebeş

Arta : kira qenc, rastî, dadmend û hîn bi wateyin din ve tê bestin di Gathayên Zerdoşt de, Ahûra : xudê di dînê zerdoştîê de, spenta : pîroz.

 

 

Minhoyekî (têkst) pûblîsîstî

Xinizî

3

Xinizî kelepîreke kurdî kevnar e

bi şanazî bi kurdina re dijî

Xinizvanên kurd

bi vajayî yên dinyayê

natêne dadgehkirin

bidarvekirin

ew hîn hikumdarîyê

bi navê bîyanîyan

li kurdan dikin

Xinizî

dareke li ser tirba

Celal Talbanî hişînbûye

Xinizî

dîyarîyeke emerîkanî ye jî

ji kurdan re

çiqas pir in dîyarîyên wê

Xinizî bawerîyek e

van rojina li ser bajarê

Silêmanîya

Qasim Silêmanî dimilmile

  1. 10. 2017

Husên Hebeş

Xinizî bi wateya xîyanetê tê, Verrat, betrayal, измена.

 

 

Axaftin bi mirinê re

Bîranînên xwe Lorîn li ser

nîgara herikîna xwînê dinivîse

lîstikên xweyî birîndar birefdike

û perçeawazên tenbûra bavînîye pelixî

ewên bi mêtina şîrê dayîkê re guhdardikir

 

Niha ew teqîna bomban

ji colên balfirên cenganî dibîhse

yên berî du rojan dêbav

di bin xopana avahîyê de hindakirin

kes nehêştin ta pisînka Şînaye

çevdurengî ya xalo li Wanê

jê re perwa anîbû

 

Kes li dor Lorînê nema

her bi endamên mirinê re dilorîne

7.2.2017

col : ref, perwa : dîyarî

Xurîn

Bi du ebrûyê te cana dixurim ez“

         Melayê Cizîrî

(xurîn: swîndxwarin)

Erê Cana!

Bi herdu çehvên te dixurim, swînd dixum,

Cana!

Ev rêvebirên kurdan bin,

emê tim bindest bin.

Husên Hebeş

Bonn,  4.12.2016